ГАЗРАА БЭЛЭН ОРОН СУУЦААР СОЛЬСОН ИРГЭД ТҮЛХҮҮРЭЭ ГАРДАН АВЛАА

2020/02/20
ГАЗРАА БЭЛЭН ОРОН СУУЦААР СОЛЬСОН ИРГЭД ТҮЛХҮҮРЭЭ ГАРДАН АВЛАА

Нийслэлийн агаар, хөрс, орчны бохирдлыг бууруулах, төвлөрлийг сааруулах зорилгоор газрыг орон сууцаар солих ажлыг “Нийслэлийн Орон Сууцны Корпораци” эхлүүлсэн.

Одоогийн байдлаар Сонгинохайрхан дүүргийн 9-р хороо буюу Баянхошуунд амьдарч байгаа 85 өрх санал нэгдэн 5,2 га газрыг чөлөөлж өгөхөөр болоод байна.

Өнөөдөр Нийслэлийн Засаг Дарга С.Амарсайхан, Нийслэлийн Орон Сууцны Корпораци ХК-ийн захирал Б.Сүхбаатар нар  дээрхи 85 өрхийн төлөөлөл болгож 10 иргэнд орон сууцны түлхүүрийг нь гардуулан өглөө.

Эдгээр айлууд хамгийн багадаа 2 өрөө байр, дээд тал нь  гурван ширхэг 2 өрөө байр  авч байгаа бөгөөд 85 өрхөд нийтдээ 105 байр олгогдож байгаа юм.

Нийслэлийн Засаг дарга бөгөөд Улаанбаатар хотын Захирагч С.Амарсайхан:

“Гэр хорооллыг орон сууцжуулах төсөл хөтөлбөрийн хүрээнд газрыг орон сууцаар солих ажлыг шинээр эхлүүлээд явж байна. Өдгөө Сонгинохайрхан дүүргийн 9 дүгээр хороонд 5.2 га газрыг орон сууцаар солих ажил зохион байгуулагдаж байна. Нийслэлд орон сууцны хөтөлбөрийг хэрэгжүүлэхдээ орлогод нийцсэн, айл өрхийн амьжиргаа, төлбөрийн чадварыг уян хатан байлгах зорилгоор түрээслэх, түрээслээд өмчлөх, худалдан борлуулах гэсэн олон сонголтыг иргэддээ санал болгож байгаа. “Буянт-Ухаа 2” хорооллын 972 айлын орон сууцыг нээлттэй шударга зарчмаар сонгон шалгаруулж иргэдийг хамруулсан. Харин иргэдийн эзэмшил газрыг бэлэн орон сууцаар солих ажлын цаад зорилго нь өнгөрсөн хугацаанд хийсэн алдааг давтахгүй байх, газраа чөлөөлөөд байртай болно гэж хүлээсэн иргэдийн итгэлийг алдахгүй байхын зэрэгцээ дараа дараагийн орон сууцнуудыг барих газартай болж байна” гэж онцолсон юм.

“Нийслэлийн Орон Сууцны Корпораци” ХК-ийн захирал Б.Сүхбаатар: 

"Иргэдийн газрын үнэлгээг үнэлгээний компани хийж байгаа. Зах зээлийн ханшаас 2-3 дахин илүү үнэлэгдэж байна. Газрын суурь үнэлгээн дээр хүний гараар бүтсэн бүхий л зүйлийг нэмж үнэлсэн. Чөлөөлсөн 5,2 га газар дээр 800-1000 айлын орлогод нийцсэн ногоон орон сууц баригдаж, инженерийн болон нийгмийн дэд бүтэц хийгдэнэ. Энд баригдах 800-1000 айлын орон сууцны 15 хувь нь түрээсийн, 35-50 хувь нь түрээслээд өмчлөх буюу орлогод нийцсэн орон сууц, үлдсэн хувь нь зах зээлд борлуулагдана" гэж ярьж байна.

Гэр хорооллын газрыг дахин төлөвлөн барилгажуулах төслийн 19 байршил, нийслэлийн таван дэд төв нийт 24 байршилд 1216 га газрын 20.477 нэгж талбарт амьдарч буй иргэд газраа орон сууцаар солих төсөлд хамрагдах боломжтой болсон юм.

Газрыг орон сууцаар солих төслийн хүрээнд хамгийн багадаа 4 га талбарт газар чөлөөлөлт хийнэ. Учир нь тухайн талбарт орон сууцны хорооллоос гадна сургууль, цэцэрлэг, зам, авто зогсоолтой хотхон байх ёстой. 4 га газар нь дунджаар 90-100 иргэний өмч хэлбэртэй байгаа юм.

Иргэд 100 хувь санал нэгдээд газраа орон сууцаар солих хүсэлт гаргасныг үндэслэн төслийг хэрэгжүүлнэ. Нэг иргэний газар 40 сая төгрөгөөр үнэлэгдсэн ч 70 сая төгрөгийн орон сууц авах хүсэлтэй байгаа бол үлдэгдэл 30 сая төгрөгийг таван жилийн хугацаанд 8 хүртэлхи хувийн хүүтэйгээр зээлд хамрагдан төлөх нөхцөлтэйгээр төсөлд хамруулах боломжтой.

                                                                                                                                                           П.Болор

                                                                                                                                                                            

ГАЗРАА БЭЛЭН ОРОН СУУЦААР СОЛЬСОН ИРГЭД ТҮЛХҮҮРЭЭ ГАРДАН АВЛАА  
Тэнхлэг зууч ХХК - Facebook